Adhamiria kujenga kituo kikubwa kuwasaidia wengi.
Na Veronica Mrema
Ayshat Sanya huenda likawa jina geni kwa wengi wetu, lakini kwa watoto yatima na wanaoishi kwenye mazingira magumu aliowahi kuwatembelea, wanamfahamu vema.
Ni msichana mwenye umri wa miaka 21 hivi sasa, akiwa amefanikiwa kushawishi wenzake 10 kuungana naye katika kusaidia jamii.
Mitandao ya kijamii ikiwa ni sehemu ya nguzo zake anazozitumia kujenga hamasa na mtandao huo wenye mlengo chanya kwa jamii yake.
MATUKIO NA MAISHA BLOG hivi karibuni limefanya mahojiano na Msichana huyo, pamoja na mama yake, Dk. Zaitun Bokhary.
Karibu ufuatane nasi... "Msichana huyu mdogo alianza kuonesha mapema kwamba ana kitu ndani yake cha kupenda kusaidia yatima na wasiojiweza," anasema Dk. Zaitun.
TANGU MIAKA MITATU
Dk. Zaitun ni Bingwa wa Upasuaji wa Watoto na Makamu wa Rais wa Chama cha Madaktari Wanawake Tanzania {MEWATA}.
Anasema katika Chama chao wana desturi ya kutembelea vituo mbalimbali vya wahitaji ikiwamo yatima na kuwapa mahitaji mbalimbali.
"Ni katika shughuli hizo, kuna wakati nilikuwa naenda na Aishat, tangu akiwa na umri wa miaka mitatu.
"Ni binti yetu wa kwanza kuzaliwa, ni mtulivu, mwelevu na anayejiamini mno.
"Akiweka nia ya jambo fulani, mara nyingi hulitimiza, ana ushawishi kwa wenzake na wengi humsikiliza na kumfuata," anasema Dk. Zaitun.
Anaongeza "Ana mvuto kwa watoto pia, kadri umri wake ulivyokwenda mapenzi yake na watoto yalizidi kuongezeka.
".., nilipokuwa nakwenda naye kule vituoni, kuna muda tulijikuta tunamtafuta, kumbe yupo katikati ya kundi la watoto, akizungumza na kucheza nao.
Anasema kuna nyakati zilikuwa ngumu kwake {Ayshat, mwenye furaha kwenye picha, chini}, pale alipoketi na kuzungumza na watoto hao wa vituoni.
"Nilikuwa namueleza hatuwezi kuondoka nao, tutaendelea kuwatembelea, ilikuwa nyakati ngumu, alihuzunika mno," anasema.
Ayshat anasema hata akiwaona watoto wakiwa wakitembea-tembea kuombaomba barabarani huhisi vibaya moyoni mwake.
"Huwa najiuliza vitu vingi, muda ambao wanaranda-randa huku na kule wenzao wako masomoni, kwanini wapo pale, nani atawasaidia, najiona jukumu hilo ni langu.
DHAMIRA YA MOYO
Anasisitiza kwamba amedhamiria kutimiza maono yake ya ujenzi kituo kikubwa cha kusaidia watoto yatima na waishio katika mazingira magumu.
Ni maono makubwa mno kulinganisha na rika lake, Ayshat anasema anaamini Mwenyezi Mungu atamuwezesha kuyatimiza kwani ni jambo jema.
"Najua sitaweza kuwachukua wote lakini kwa sehemu kubwa nitakuwa nimesaidia jamii yangu," anasema.
Msichana huyo amefanikiwa kuunganisha vijana wenzake wapatao 10 wanaoshirikiana katika kusaidia jamii.
"Awali nilianza na wachache, tulikuwa tunajichanga na kwenda kutembelea watoto vituoni, kuanzia Desemba, 2020 ndiyo tukawa tumefikia 10," anasema.
"Mwanzoni ilikuwa ni marafiki tu tukishirikiana ila sasa tuna kikundi cha watu 10 ambapo kila mmoja ana jukumu lake katika kikundi. {Pichani chini ni baadhi ya wana-kikundi walipotembelea moja ya vituo hivyo}
"Kwa mfano watoto wa kike wasio na uwezo kupata taulo za kike na mahitaji mengine muhimu," anasema.
Anaongeza ".., Pia tunatumia mitandao yetu ya kijamii ikiwamo WhatsApp, Instagram, Snapchat kupaza sauti kwa masuala yanayosumbua jamii na yanayoathiri vijana vijana kwa njia moja au nyengine.
"Sisi wote {kwenye kikundi} ni wanafunzi wa vyuo mbalimbali," anasema Ayshat ambaye hivi sasa yupo nje ya nchi akisomea masuala ya biashara.
Anawashukuru wazazi wake kwa malezi bora wanayompatia, yaliyomsaidia kujitambua.
Anawashukuru vijana wenzake waliokubali kuungana naye katika kusaidia jamii na hivi sasa wanakamilisha hatua za usajili wa Taasisi.
Dk. Zaitun anasema yeye na mumewe wamekuwa wakiwaongoza vijana hao ili watimize malengo yao.
"Huwa tunachanga pia wanapokwenda kutembelea vituo, nawapa usafiri, kwa mfano hivi karibuni walitembelea kituo kimoja huko Bagamoyo.
"Wazazi na walezi nawasihi wanapoona vijana wana maono kama haya wawasaidie waweze kuyatimiza," anatoa rai.
Chapisha Maoni